ГАЛЕРИЈА: Изгаснат пожарот во Трескавец - дваесетмина остануваат цела ноќ кај манастирот

Македонија | 4. февруари 2013 - 23:34

Прилепчани се потресени од огнената катастрофа зашто манастирот е едно од најпознатите свети и културни места не само за домашните, туку и за странските посетители.

Пожарот во манастирскиот комплекс „Трескавец“ вечерва е изгаснат. Според командирот на прилепската противпожарна единица Станко Колески кој е на теренот, 10-ина пожарникари, исто толку граѓани и полицијата остануваат ноќеска да ја следат ситуацијата.

Во големиот пожар што денеска избувна во манастирскиот комплекс околу 14 часот, изгореа конаците, а спасени се црквата „Успение на пресвета Богородица” од 13 век и трпезаријата која датира од 14 век.

Во борбата со огнената стихија денеска заедно интервенираа три армиски хелихоптери, армиска единица од прилепската касарна, противпожарната единица од Прилеп, возило од Битола и преку 200 граѓани кои се одзваа на апелот на Центарот за управување со кризи за да помогнат во гаснењето.

Во Прилеп вечерва министерката за култура Елизабета Канческа-Милеска најави дека увид на местото прават стручните екипи на прилепскиот Завод и музеј, а утре ќе биде доставена информација до Владата за потоа да се прави план и проект за обнова на овој споменик на културата со светско реноме.

Истрагата ќе покаже како настанал пожарот и колкава е штетата, но според првичните сознанија се појавил во гостинскиот оддел па стихијата ги зафатила монашките простории. Кога избувнал пожарот во манастирот биле искушеникот Калист и еден гостин.

За утре во Прилеп се најавени вонредни седници на Општинскиот и на Економскиот совет со цел да се направи план за обнова на манастирските конаци.

Пожарот е идентичен со оној од 9 јануари 1990 кога изгореа конаците кои беа обновени со доброволни прилози на прилепчани и на стопански субјекти на државата

Follow @Press24mk